Markaðsfólk gleymi ekki eldra fólki

Rúnar Kristmannsson elskar að fara í matvörubúðir í utanlandsferðum, skoða sig um og fá innblástur. Það er ekki að ástæðulausu, enda starfar Rúnar sem sérfræðingur í markaðsmálum hjá Krónunni.

‍

Herferð spjallaði við Rúnar um mikilvægi þess að gera allt upp á tíu, hvaða hlutverk gildi Krónunnar spila í efnissköpuninni og af hverju fólk 60 ára og eldri eru vanmetnar hetjur markaðsmála í dag.

‍

Vöruhandbókin tekin bókstaflega

Krónan hefur unnið sér ákveðna sérstöðu á íslenskum markaði fyrir vel heppnað vörumerki og skýr gildi sem eru allt umliggjandi, bæði í verslununum og á miðlum keðjunnar.

‍

„Við fylgjum vörumerkjahandbókinni sem við uppfærðum fyrir þremur árum nánast upp á tíu, þetta er smá eins og Biblían okkar," segir Rúnar aðspurður um hvernig hann og teymið nálgist þróun markaðsefnis fyrir miðla Krónunnar og bætir við: „Það er líka mjög ríkt í okkur að gera allt almennilega, ekkert hálfkák. Við erum þétt og öflugt teymi hjá Krónunni. Við köstum boltum sífellt á milli okkar og margir koma að daglegum verkefnum hverju sinni. Það skiptir okkur miklu máli að stíga í takt og vinna saman að því að ná okkar markmiðum.“

‍

Forðast gúllasið

Í daglegu starfi snýst það aðallega um að tryggja að hágæða efni birtist fyrir augum viðskiptavina, sem styrkir tengslin sem þau hafa við verslunina.

‍

„Það er kannski það sem er ofar öllu fyrir okkur, þegar við erum að búa til markaðsefni, að það sé skemmtilegt, fallegt, fjölbreytt og eitthvað sem fólk tengir við.

‍

Við reynum að forðast það að vera í einhverjum gúllasauglýsingum, þar sem er bara vara og verð.

‍

Við leggjum líka mikið upp úr því að lyfta upp hollari valkostum, eins og til dæmis lífrænum vörum. Við gætum þess líka að það sé jafnvægi í þeim vöruflokkum sem við auglýsum þannig að það passi okkar stefnu." 

‍

‍

Rúnar nefnir að það séu til afar tryggir viðskiptavinir sem séu einfaldlega Krónufólk og að það hafi mikið með skýra sýn vörumerkisins að gera og að gildi Krónunnar spili þar lykilhlutverk. Að vera með skýr gildi sé að mati Rúnars nokkuð vannýtt tól í markaðsmálum.

‍

„Þetta verður til þess að viðskiptavinurinn heldur svo miklu meira með okkur. Þau verða Krónuviðskiptavinir." Rúnar bendir á að þau lesi kannski ekki endilega allar fréttagreinar sem birtast um Krónuna eða sjái allt markaðsefnið heldur gangi þau einfaldlega inn í Krónuverslun og finni að þar er ótrúlega mikið af fersku og hollu í boði.

‍

„Það er bara einhver ákveðin tilfinning. Við notum sömu skilaboðin aftur og aftur og þá verður þetta ómeðvitað. Um leið og viðskiptavinurinn finnur stefnuna okkar og gildin í upplifuninni, þá er það sigur fyrir okkur" segir Rúnar.

‍

Efnissköpun á búðargólfinu

Aðspurður um efnissköpunina og hvort þau nýti sér stúdíó segir Rúnar að þau séu í raun út um allt. Sumt efni sé skotið á skrifstofunni, á fremur heimilislegan hátt með einfaldan bakgrunn, en yfirleitt séu þau bara að flakka á milli verslana og skjóta þar.

‍

‍

„Það býður upp á svo marga möguleika að taka upp í búðinni" segir hann og bætir við að það snúist líka um að taka upp efni í sömu aðstæðum og viðskiptavinurinn er í og þar sem hann mun sjá vöruna að lokum

„Að labba um og skjóta myndefni í nýfylltri ávaxta- og grænmetisdeild, það er bara æðislegt! Það gerir okkur kleift að taka upp í fallegu og náttúrulegu umhverfi hverju sinni. Hvort sem við erum að framleiða leikið efni fyrir TikTok-rásina okkar, kynningarmyndbönd fyrir innri miðlun eða einfaldlega myndir af fallegum framstillingum sem fólkið í verslunum Krónunnar hefur töfrað fram.“

‍

Rétt efni fyrir réttan hóp

En það er ekki nóg að ná fullkomnu skoti af gljáandi og brakandi fersku epli, það þarf líka að taka strategískar ákvarðanir um hvernig efnið er nýtt og birt til að það nái til rétta hópsins. Rúnar útskýrir að markaðsefnið sé að miklu leyti þróað með það í huga að mismunandi vörur höfði til ólíkra markhópa.

‍

„Þegar við erum að fara birta vöru þá tökum við rýni og ákveðum út frá því hver markhópurinn er. Þetta ræður því hvar við framleiðum efnið fyrir þessa tilteknu vöru.“

‍

Ekki hjarðhegðun heldur upplýstir neytendur

Spjallið færist lengra yfir í markhópa og hve vanmetnir eða misskildir ákveðnir hópar eru.

‍

Rúnar nefnir yngri kynslóðina, Gen Z, og uppákomuna með bandaríska snyrtivörumerkið E.L.F. Mikið fór fyrir komu merkisins í hérlendum fjölmiðlum en Rúnari þykir miður að ótrúlega vel heppnaðri inntöku á vöru hafi verið lýst sem hjarðhegðun og þar sem greina mátti hæðnistón gagnvart viðskiptavinunum sem voru einfaldlega yfir sig ánægðir með þessa nýjung á markaði.

‍

„Fyrir okkur er þetta bara hópur sem er afar áhugasamur og upplýstur. Við höguðum markaðssetningu á vörumerkinu nánast einungis í gegnum TikTok ásamt því að vinna með flottum áhrifavöldum.

‍

Við sáum strax að viðbrögðin voru svakaleg og að þarna höfðum við náð til rétta markhópsins.

‍

Að sjálfsögðu var hæpið stórt en þetta er hópur sem veit nákvæmlega hvaða vörumerki hann vill.“

‍

60 ára og eldri leyna á sér

Annar markhópur sem Rúnar segir að sé misskildur og vannýttur í markaðsmálum sé eldra fólk. Hann hafi sótt fyrirlestur hjá erlendum markaðssérfræðingi fyrir einhverjum árum og þar hafi augu hans opnast fyrir því hve merkilegur og dýrmætur markhópur eldri fólk sé sem má ekki hunsa í markaðsmálum.

‍

„Þú verður 55 ára og bara hverfur. Ungdómssýkin er auðvitað allt í kringum okkur og allt á að vera ungt og fallegt.“

‍

Rúnar segir það einfaldlega vera óraunverulegt og að við sem markaðsfólk séum að missa boltann með því að nota ekki eldra fólk í auglýsingar.

‍

„Þetta fékk okkur til að hugsa um nauðsyn þess að nýta eldra fólk meira í okkar markaðsefni. Þetta er stór og mikilvægur hópur viðskiptavina Krónunnar og við eigum að sjálfsögðu að tengjast honum enn frekar“ segir Rúnar að lokum.

‍